اسقـــم نتقـــراولــة نوغرم نتغردايت

ترنابيت نتمنونت ندزير تسرس دقاع البلديات اقن اوسقم اوقابل دسجوري نلمور نتقراولة مع احسس نمدان اوعاون دمول نالمراكز اياالنية نوسوفغ نتومان سدزير سوغيل.
اسقم نتقراولة نلقصر نتغردايت اتوغ فتبجناس ابراهيم رمضان ادلول اسقس 1918 اغرم نتغردايت .دفر سز نسقسان اويت باباس غال اوغرم نغليزان مان يوتف اغرباز نوحفاظ نالقران ال ديوي الشهادة نالابتدائي اقن سغربازن نغليزان بعد ومن اوط غال وغلان يقضع طول غال اوغرم نلقرارة مان يوتف المعهد نالحياة اورني نوعزامس العلوم نالشريعة يلمد يب يغلب سوفس نالمشايخ دنعزامان اتوغان دسلملدان المعهد.
اسقس 1939 يبدى اسعزم اغرباز نالاصلاح تغردايت مان يجد اقن لثار دوحدي انلمادن المبدا نوغسى ندزير دالوطنية دوخدام نالدين دالمجتمع. مان يج الاستعمار ادسرس غفس تط فنجال نالخطب ايتوغ اتدج تمجدوين ضد الاستعمار دوس اخدم ادس ال دتوطف الحبس امناو ايارن.
امار نتقراولة اتوسرس دمقران نوسقم نتقراولة نوغرم نتغردايت الولاية فيد سز المقرس يتوغ تجم نبوشمجان تغردايت دنشان نجراون ددملاقة دنشان نوجرو نريال دسمورا دالتاولات نلمعاش دسلاح ايالمجاهدين دسوضنسان غال المركز نالقيادة اورير نعمور .
اسقس 1957 اتوطف يد سن نالمجاهدين الناصري علي د الحاج صالح بابكر الحبس المدة نسز ايارن لجوايه نالاغواط.بعد ادفغ سالحبس يرني امعاون يد المجاهدين دالثورة ال دعاون اعاود اتوطف الحبس نبربروس اسقس 1960 يد ا الحاج ابراهيم دادي واعمر مان يتوغ اسلماد ايالمجاهدين توتلايت نتعرابت دوعزام . يرقب قاع لنواع نوعذب اباش ادقر يوش نسماون نن الان ندهان يد تقراولة امبصح الاستعمار اولنجم باش ادطف سس شرى ة انغ اديوش اسماون نمدتشالس اتوغان خدمان ادس سسان محمد رمضان، يحي حواش، وحمو حجاج، وحمو بابكر، وعيسى عبونة .
بعد تمنوننت ندزير يرني الحاج ابراهيم رمضان انداهس يد ترنايت الفلان ال ادقضع غال يوش امقران بعد اودى الامانة دالعهد نوحرر ندزير سوفس نفرنسا. وني دقن سالنماذج نرجازن اسبلان اماننسان اتقراولة ندزير مع يغلب نضضنين اتوغان خدمان تعاونان بلا ما ادسان حد اسموننسان انغ غارن بعد الاستقلال اوطوف نتمورا انغ تحونا. انن درجازن اخدمان ارب اولجي اياالدنت.