الزربيــة نوغـلان

الزربية نوغلان دقن التراث اتوسان دقاع تمورا نالدنت توسان سالضوفت توحديت دوخدام ننتدت دللوان دزمولان اسشنان امزروي نوغلان دلعوايد نغزر نلمزاب.
تموطوت انتها اتخدم الزربية تدارت ارجاز اخدم ازغار تمطوت تعاون ارجازس سوخدام نلرهاط نزرابة دالتاولات اضضنين انتشبرين دتقاشبيين دسوشى دقاع ابسون اسحقان تمدورتنسان.
الحرفة تتشرد اغلان سومن توسمان ات مزاب سات اغرسان فنجال نوخدام نزطوان دالضوفت اعربان نتنري تاوند الضوفت غال وزغار نوغرم تاوين ادسان لنواع نزرابة دبسون اضضنين اتوخدامان اغلان.
الزربية اناف دس مناو ازمولان اسشنان امزروي نوغلان اناف دس تمشاط دتشححت نتسلات تش نوزط دمناو ابسون اضضنين اغرسان تدشلا مع لعراس دون اتسحق تسلت الفرحس. اماشي اناف مناول لوانانوزقاغ دووراغ تشني للوان اتوستعملان يغلب اغلان.
اش اسقس الولاية نتغردايت تسدار العيد نالزربية مان توسدجان دس مناوت تفسكوين ددملاقة ندباب نالحرفة دقت الفرصة نوزنزي نالسلعتنسان دون اخدمن امدان دالسياح اتلسان سدزير دوزغار باش ادوين ادسان اقت الزربية الان دروس اتووف انشان وضضن.
اسقسن امدجورا ابدانت مناو ادباب نريال اخدام نزرابة اسقارن زرابة نالماشنة انغ نالمصنع دس مناو ابسون دجددان اولجي انتن نتدارت توخدام سالضوفت ننتدت دالضوفت توحديت.
الزربية نوغلان تحوسا يغلب دفر اتاف نزرابيو فنجال نورخسسنسنت دالوجد نتمعالت اجنت تمطات ددباب نالحرفات تسيبانت الحرفة قضعنت غال الحرفات خلاف.
سالاثار اوشتمان دخ اروال نتسادان دتبورخستين سوخدام نزطوان تدارمان اناف يغلب نتماطات اولسننت بات دزط انغ بات دالضوفت اولغسنت اركب نزطوان اماس نتدارسنت مع اتاف نالتاولات نالتكنولوجيا غال وماس نالمجتمع.
يلزم اماروا فتدشلوين ددباب نالحرفات بالخصوص اغربازن دالمعاهد ادستفان اسلماد نالحرفة نوخدام نزطوان ايمزانان دوس يوسد غال الدنت قبل اتقضع الحرفة الان غرس امارو دلان اسوس ادتشرد اغلان .