الشيـخ محمـد قرقر الطـرابلسي

الشيخ محمد بن الحاج ابراهيم بن سليمان قرقر اتوسمى الطرابلسي امغر ايلولد اغرم نطرابلس تمنغغت نليبيا اموني بعد اهاجر باباس اسقس 1885 سوغرم نبريان غال طرابلس مان ايلولد الشيخ محمد اسن 15 جانفي 1887 م . يحفظ القران اماس نقن سغربازن نطرابلس يعرضت العمرس14 نسقسان يعني اسقس 1900 سا نالروايات اتوعزامس سس القران يسعى تفرت نوجود نالقران تمجيدا نباشا برغوث اماشي اتوعين دالمجود نالقران تمجيدا نحسن باشا . اسقس 1904 يدول غال وغلان ابريدس يقضع فالجامع  نالزيتونة تونس يقم دس سا نيارن ايلمد اتب العلوم نالفقه دالاصول نالدين سمقرانن نتمجيدا نالزيتونة. سن اوط غال بريان اقم دس سن ايارن سن يقضع غال ات ازجن اورني نوعزامس  الشيخ اطفيش مان يعمر تام نيارن تجننت الشيخ الحاج عمر بن حمو بكلي اقضع اش الخميس غال ات ازجانا وعزام الشيخ اطفيش بعد تام نيارن اعاود ادول غال طرابلس ليبيا مان اتوعين اسقس 1909 دسلماد اغرباز نالاتحاد دالترقي دس اخولط انعزمان دمناو ندباب نالسياسة ابدان احارب نالاستعمار نالطاليان سترى نالقصائد دالمنشورات مع احسس نمدان اوتشور مان الاستعمار يدول غفسان سوؤمم نويتلنسان  دودكنسان لحبوسات اما طرابلسي اينجم ادرول غال بريان يمنع نت دتروس دتغرسان. يبدى اسعزم بريان يوتف احرش نوسلماد اويد النية نوسقم نوعزام دحارب نالجهل اتوزاقا غال القرارة اموني بعد ارزام نقن اوغربازدجديد بعد اوفين دس قاع الشروط نونعزام دالافكار اغرس اوسقم نالحالة دوحارب نالجهل.اخصص اش الخميس اقن الدرس  ادمدان اماشي اتاوي انلمادن غال وزغار نلقرارة اوفورهت دالرياضة. مناو انعزمان دمقارنان عزمان سوفوس نالشيخ محمد قرقر انالشيخ عدون دالشيخ صالح بن يوسف ابسيس دالشيخ محمد بن بكير باشعادل. اماشي غرس فوس اوجد نوسلف نالمعهد الحياة لقرارة . اسقس 1930 يطف ابريد غال بسكرة ايوتف تدشلا نالعلماء نمسلمان . اسقس 1947 يدول غال بريان مان يقضع دلمانة غال يوش امقران اسن 25 ديسمبر 1948 توسدجايس اقت تنضلت ايتزعلك حضرن دس للوف نمدان ادوسين سايولو تمو.