جيت نفاصي صورة الشر
نلقى وكالين السحت قباحو
ناس خايبين لفعايل والمنظر.
تنهيه يقلك كل حد يعرف صلاحو
يخليك في عجب الدنيا تفكر.
شوف الضماير كفاش طاحو
تقول لا قرا لا لله كبر.
وراء اللهفة أيامو راحو
غاشي عقاب الفانية يتكركر.
ما تشوفش البسمة في ملماحو
بمال الحرام تلقاه يفخر
كبار العقول بفعايلو باحو
زادم ما يخاف يوم المحشر.
يا سعد لي بالقناعة مالي جباحو
أفة الرشوة غير تتكاثر.
البعض النار في جيابهم لاحو
ناس برزقهم و يبكو لفقر
تسمعو يشكي يشفك نواحو
وناس عايشة برحمة ربي والستر.
بالحمد والشكر مزين فراحو
وناس تقول ناض فيها الشر
حتى على تاع الغير يتلاحو
الشيء لي جاء قدامو يجر
ما يطعم مسوس من ملاحو
يحب ضعاف النفس عليه تهدر.
يقولوا فلان مادراك بسلاحو
أعتقنا يا ربي من شباه البشر.
بجاه نبيك وينك ولاحو
