لحقني سوالك فالظلمة وبكيت
وعند الحيط كفكفت دموعي
لحقني سوالك عالجرة ولليت
وشعلت المحبة مابين ضلوعي
لحقني سوالك ماذا ريّبت وبنيت
لقمر نتيا ونجومك طلوعي
سايست لعمر جرى بيا ونسيت
قريت سوالك ناضت وجوعي
منك فنات لعظام هشت ورشيت
لا تلومي ولفي صهدة رجوعي
قالت ليلة عرسك ع المرة حنّيت
روحك شرطانِ ومهر دفوعي
خلليت الغمة تفزع للموت جريت
دمعي بالحمة خلعت فجوعي
زغريتة من عرسك شقتني وفنيت
حسيت الحقرة نحرت ربوعي
دريانة بالعين عماة وماذا السنيت
ولومي بالعوام يا شبعة جوعي
خفت الموت تديك وبقلبي مافتيت
ترجع ليك الروح ويهدى روعي
سوالي ليك ينوح وتفهم ما قاسيت
قلي لاه نسيت وحيرت سموعي
لحقني سوالك وعلى حوشكم عديت
ولقيت الناس تحاشات جموعي
قلتلهم وين السمرة ع سوالها جبيت
ودخلت الدشرة نحسب سبوعي
خطواتي تثقال على جمرة حنتيت
لحقت الساعة على قلب فزوعي
بين ربعة والحيط بقعادي حطيت
و تبسم خاطري وجدت دروعي
كرموني بعشا عيني من بيت لبيت
نسرق في لنظار وكثرت ريوعي
كان خيرهم يفوح لمحبتهم شهيت
سالوني بالخير طلعت شروعي
جاني فرخ الطير ضناها ما حسيت
متبسم ليا متودد على كوعي
قالي ماك غريب وفاك جابك للبيت
فيك دفا لميمة حير صروعي
شكي ليه غواني وشفت للي حبيت
ظنيتو فرخي فيه من طبوعي
حضني ع القلب بغيتو وانا ما قديت
قابلني بضحكة نورت شموعي
حرحر قلبي وفنيت فرفر وتهديت
مادريتو منها ناضت صدوعي
قالت هذا طيري لي بحالك تمنيت
دار عمري كي دار قوات نزوعي
ياريتني نشم الريحة للقلب لي خلليت
نفسي تتمنى ونحضنو بذروعي
نبكي ع القمرة نقطع لرسام عييت
خابت طريقي خونت ركوعي
بندامة ترويت الديت حسرة ومشيت
لا ظل جرى ليا لاخيال تبوعي
طفت على حيطها ورجعت منين بديت
لسوالها نقرى والليل شفوعي
دمعة ع لفراق و غم القنطة شفّيت
نعدد ع ليام لحست قصوعي
وحداني وغريب والقلب ليمن شتيت
هدولي نجمي بسحور ضبوعي
مكتوبي نهدى وقدري مكتب ورضيت
الشدة في ربي يانفسي طوعي
نلقاها فالجنة عيني وحوري لي بغيت
الزهوة تملاني ونحصد زروعي
