ثتوشهرالولايث انباثنت سي مثلا سحافظ نلخلاث انس فلقش انزيك اقلا ارمز لآزرف نالدزاير امقران، وسزياي اقلا ورعان نهنتين تحفاظنت فلاس يتاسد اروض نتقشابيث ذامزوارو وحتى ما ني ادرقا اروط نالوقثاي ورعان ارقازن اتحبان ثقشابيين سيرتو ذي المشتا.
و استعدا المشتا غرس سن ألشهار وإعداد إيذس أسميط، بذو لغرو انلوراس أمقران أتراضن ثقشابين خاطر أروظاي ألان أتاضنت زيك لجداد انغ ويتسريهن سي أسميط، وماني إيبذا الحال يتبدال يكر أسميط و أتوث النوّث ولاّن إرقازن وحتى لجان أنباثنت أتراضن ثقشابين أقلا إيفنت لباس نقشش يحلى، وأمين إغننا عمي الصالح انلقاث ذي الجامع نـ1 نوفمبر ذي باثنت بلي نتا ذادريث أنس كامل غرسن ثقشابين خاطر ثمغارث أنس أثقاس كامل بشام أذحافظن فأروضاي وأذسرن إماننسن ذي المشتا.
وصح أرقينتيد ثقشابيين نالبيع اتنوزانت وألان لباس أقلا أساغنهنت سسومت 4000 دج، بصح ألانت لعوايل ذي لوراس أمقران ذي باثنت أذخنشلة أذ أم البواقي أذ قالمة إقمرا لخلاث أنست زطنت ثقشابين ذي ثدار أنسنت، وساغنتيد القطن يحلا وأتقنت ذي سدايين واتمعاننت اوبعد زطنت سنت نالخالاث لخذمتاي كامل ثتموقا ذي الصيف خاطر ذي المشتا يصمت الحال ولازم ثقشابين أتي ثوجذ أمين إغنتقار الحاجة عقيلة، أقلا أثقا لباس نتقشابين زيك أثروانس.
وثطوال أقلي لخذمت نتقشابيث ماني إثتطف حتى 3 لشهار سيرتو ما ني أثتيليش لمعونت، وإخدم ذقزتا يشت نفوس، بصح لوراس أمقران سقلا وسنت انيغ تلاثة نلخلاث أقخدمن ذأقزطا بشام أذكملنت له ليه، خاطر لخذمت أنس ثسغلاب وثسكراه، وثغاوس ثيش نتاث ثأقلا اتزط أثخدمش لخدمت انداه، بشا اتكمل زيك أثطوالش ذيس.
ثقشابيث أنلوراس ذلمفخرث تامقرانت، وتحفاظنت فلاس لعوايل كامل، ولوكان اتحوس مليح أثتافذش أخام بلا ثقشابيث، اولان حتى ذي الوقث نتكنولوجا لباس اقلا تشجاعن دريث انس فو روطاي خاطر نتا ظاروط ني رقازن انزيك صح صح اقلا حررن الدزاير .
