تمسردين دقت الهيئة نتسادنان تفغد سالهيئة نعزابان تقابل لمورد العلم نتسادنان الان لاشغرس الحق اورجاز باش ادقابل لمور نتمطات سومن اسلف نالهيئة نعزبان اسوفغند ادس الهيئة نتمسردين امونس ابدى نالقرن فيدتس الهجري. اماشي اتقابلت لمور نلعراس دتماتانين مع اسيرد نمنت تسادنان تقابلنت لمور نوعزام دوسلمد نالقران دالدين اتماطات اموني الحلقات نوعزام لمحضار انغ تدار نوعزام. دقن النظام غرس القواننس باينان كل حد انشانش خدمنت ارب لاش اقن لافرنك انغ اقن المقابل ضحانت ديوودم نرب اماشي يلا الحال الهيئة نعزبان دوس اتعافر لمور نالخير عمري مسوتورن اتوخلصان انغ اطفان ريال فوخدامنسان. الهيئة نتمسريدين دس 12 نالاعضاء اتوخيرنت سوفوس نتعزابين توظهرين اسننت ازال فتبجننسنت اقت تعزابت اقارنس مامة شيخة . الهيئة تجبى دخ سوطبق نلوامر نالهيئة نعزابن بالخصوص لمور نلعراس دوقاول دوملاش دبسون الان بوسدجان اماس نلعراس مع الامر سالمعروف دونهى سالمنكر اماس نالمجتمع. الهيئة غرسنت اقن المؤتمر تتشلت اوسقس اقارنس المؤتمر نلااله الا الله جرونت المقام نالشيخ باعبد الرحمن الكرتي ات املشت مان دقلنت غال اوقيم نوسقس دتمشراس ايرقب العالم نتمطوت اغلان دبسون اجديدان مع القرارات الان ادسوفغان باش اتوطبقان . اقن الدور ايتزعلك اويد تضفوين توحديين اماس نالمجتمع مان يغلب نماسانان اقمان بارن دسات النظام داماشي ادجورن لمور اماس نغرمان نوغلان الان دقن النموذج يغلب زاقان اوبوي نالنظام دوطبقس مان يغلب نتمشراس ادمونكزنت المجتمعات.
