كنت نعلم في ضني زهري منكرني
وليام معكوسة في وجهي دوارة
وليت نعاني ونخمم علي مخرجني
م الغمة وماقاسيت فليام العصارة
يوم خرجت لحياتي ننظر للي ساعدني
ونسعد داري وخواتي بدنيا حقارة
ونهجر بلادي بالحرقة مع ليمهجرني
ولا نقعد بطال مع الناس الخسارة
لعبو بيا لصحاب ولا من جاليا حذرني
وزينولي الخرجة بلادك راهي قبارة
ما تقعد فيها طار رقادي ليل مسهرني
وبقيت نواعد في لحلام العطارة
وعجبني لكلام ولقيت لي معبرني
درت بيه القلب مشيت بلا مشوارة
حطيت برية لما هذا لكلام معذبني
قتلها نهجر لبلاد مع صحاب الدبارة
هما لي شقهم امري وربي مسيرني
و زادو عليا لهموم من نفسي أمارة
ما تبكيش عليا يا يما رضاك يصبرني
والروح مهني سلام لخوتي والدارة
ولبابا وصيه ما يحوّش بحبو كبرني
بغيضو قلبي متنوي ودموعو قطارة
خرجت فالليل ودمع السيل مرحلني
دموعي قدامي وثقالخطاوي كركارة
نمشي نتعثر وندور علي راه مغربني
لحقت شّط وركبت فلوكة الصمصارة
عطاني سترة نجاة عليها كان مدربني
وقالي ريض روحك بشوفة حرحارة
ونظرو ليا كل عيون جوفي زعزعني
مشينا فظلمة لفجر وفزعتنا لحيارة
وبدات الموجات تتلاطم ياما مبردني
فجوجنا خوالي ربي وغيرنا بحارة
تعالت لصوات يا ندامتي علي غيرني
ودبر عليا دبارة الحرقة ماهي غفارة
مانسامح فلي محني وكان معذبني
في عذاب يما وبابا النشرة ليهم خبارة
قعدت نطلع ونهبط فالموت مودعني
وثقالت خبطة قلبي لا رحمة سكارة
عيطت للمولى يا ربي بصبعي شهدني
ولا نموت بين الحوت ونربح كفارة
ضاقت نفسي ملبحر بالملح مشربني
دارو عينيا تخيلت قبري معاه لحفارة
تفكرت دعوة لميمة وينو بابا يحظني
مانموت غريب يسشفاو فيا الغدارة
ونشرب لوعة الموت بحروا مقتلني
ونموت موتتين موتة ماليها فسارة
نغدى فالماضي منسي لمن يتفكرني
كلاني الحوت عفتني الدودة الجبارة
طار بيا النوم عرفتو منام مصاورني
جريت لوالديا حلفت مانركب عبارة
ولا نقرب البحر فالمنامات مصغرني
بين الحباب وجيراني حياتي وقارة
قهوة بلادي قعدة الحيطان تسحرني
لا نهجر وطني ونتبع طريق الهجارة
طريق ما فيها خير ولغرور مطيرني
نشهد ونستغفر وربي دبارتو سطارة
