والفت لعوايل انلوراس امقران كل لشهار نالخريف ذ المشتا تتنت الفلفل الطورشي اقلا يسبهاي لميداث انس سيرتو ذقسناي اقلا صمدن ويرخس ذيسن الفلفل ذي لسواق، العادثاي نموق نالفلفل طورشي تاقذيمت لباس ثلا زيك غلجدود انغي اقلا تقنت بشام اسنيوش الفلفل بغير اثتشن القوث خاطر الان خدمن ذي لفلاحث وحرث وكرزن والشياي يحواج القوث وثاني بشام اقابل اسميط نلخريف .
ويتموقا الفلفل طورشي ستغوسوين سهلنت طول امين اغنتقار الحاجة مباركة اقلا ثوالف ثخدميث وثزنزايي اقعشيرن انس اقلا تحبان الفلفل انس خاطر ثخدميث مليح يحلا ويترقازد وبغير اثهنا حد اذتقواش اسبعذ واذروح بلا مهذيتش اسيس وبغير اثيتش معاتش اثتو.
ثقرانغ الحاجة مباركة لازم ادسغ لعبذ لفلف اقلا يطول ويحلا واذيلي اذحرش مليح خاطر الان لعباذ اثتحبانش يحر لباس، واتاويذ اتقرذ قلي ذقمان بشام اذيصفا مليح ومن بعد اترفذذ اخذمي واتبيذ فسن بلا مهتفرق واتقرذ ذي ثبدونت انيغ ذي ثغاوسا ثتوقفال ومن بعد اتتشارذ ثبدونت ذين مليح مليح واتحشرذ الفل فذين بشام اذتغماش لباس انفراغ الهوى واثفيا ومن بعد اتخبظظ بلعقل ثبدونت ذين بشام الفلفل ذين اذيرن اذيهوى مليح واذعدا ذي بعضاس ومن بعد اتقر ذي سامان بعد ما تقذ ذيسن قلي نالملح واترنيذ ثيشرث ذقلي نالقارص وكل حد يتق ذيس مات قخس انيغ قلي نالطماطم.
واتبعذذ اثبدونت ذين اتقيم قلي 20 يوم بغير اذولا اللون نالفلفل ذوراغ يحلا ويبها مليح ويوما ومن بعد كل ماهتفضرذ انيغ اتشعشام اتكس ثسحينت واتتشم سصحا اذلهنا.
