بية حمو دقت تمطوت تعاش جار اسقس 1913 دوسقس 1983 اغرم نتغردايت يوشاس يوش امقران اقت تونجمت انوحفاظ ادوبوي فساع تتشرد اماس نقت تواشولت انوعزام دالقران دتقدي انربي.
اماشي تبيي تلماد العلوم نالدين ال تدول دقت ستنعزامين نوغرم نتغردايت.
توغ اتقضاع يغلب غال تمجيدا نوجانا اتقم لمصلى نتماطات اتسلى اوعاظ نمقرانان نختني انالشيخ حمو بابا وموسى اديواس الحاج محمد باباوموسى يد مناو اضضنين اتوغان اتيشان الدروس اش اض نالجمعة ادوسان اضضنين.
دفر مناو اسقسان ترزم تدارتس اتمجروت انتمسردين دتسادنان اولماد ادوعزام نالقران اتمقرانين تبازنين اقصدنت تدارت ابية حمو اولماد نتزاليت ادوحفاظ نالقران اماشي توغ دخ اترى فتسوستنين نتماطات لمور نالدين ددزاليت دون الان تدرنت دس تمدورتنسنت فلحساب نالقران دالسنة.
بيه حمو توغ ستمقرانين انتمسريدين نوغرم نتغردايت دقت ستمقرانين نتمجروت نالمؤتمر نلااله الا الله اضران اش اسقس لمقام نالكرتي مان اتشنرسان دس لمور نتماطات اغزر انلمزاب اسوفوغند اقدى انوجرونسنت التوصيات دون انفعان تمدورت نات اغرسان بيه حمو دقت ستماطات تمقرانين ادجينت انشاننسنت اماس نالمجتمع امبصح امارو اناف دروس تسادنان انتنن اطفنت دالمذهب ادلصول نات اغرسان اديمالنسان سبلنت تمدورتنسنت امدان .
