الحاج إدريس أعوشت بن سعيد بن بكيرايلولد اغرم نتغردايت اسن 27 جويلية 1929 ستعشرت نات الحاج . وني سمزوار ااسسان احرش نالكابنيات تم نالنومرات .
يبدى اعزامس اغرباز نتغردايت سن يولي غال المعهد نالحياة لقرارة ايرني دس اعزامس ال دختم القران اموني اسقس 1948.
اسقس 1949 يوتف احرش نتجارة دوزنزي ادوسغى يولي غال بجاية يبدى اخدام دالصانع تحنوت نالشيخ صالح بن قاسم بابكر يد داود بن قاسم بابكر ادعمر بن يوسف بابكر.
اسقس 1953 يرزم اقت تحنوت يد الحاج اسماعيل بن مسعود بابا واسماعيل اماس نوغرم نبجاية. اسقس 1962 يولي غال تمنغغت ادزير مان يرزم دس اقت تحنوت تزعلوت نسمورا تلا تدجور غال امارو لجواية نساحة الشهداء.
اسقس 1969 يرزم اقت ليزين انوخدام نسمورا قار طعام يد مناو اشركان سسان أولاد قويدر الحاج شبيب الناصري علي دودو يونس .اسقس 1986 اسلفاد تم نالصناعة قار الطعام يد مناو ادباب نريال ادسلين مناوت الكابنيات اسخدمنت يغلب نمكراس اتوغان بلا اخدام .
يتوغ دقن سالاعضاء نالادارة نتدشلا نالاصلاح تغردايت دقن سالاعضاء نعزابان غرس انشانس تعشيرت ايتوغ دقن سمجاهدان اغلان دالعضو اكابر الفلان يتوغ احضر افرى نتمشراش اغلان يتوغ اتمول ادموان نتقراولة جار 1955ال 1962 سساموار نالعسكر دريال دالتاولات اموني تم نبجاية ددسانس ال دتوطف الحبس اتوتهم سوعوان نتقراولة.
يجد لثار ايزعلكان تمدورتس سوعافر دتغاريت غال الخير يدتواتس جار اغلان ددزير دبجاية دمناو اموشان اضضنين تمورت ندزير.
يقم اتعافر ادجاهد ال تياوي يوش امقران دالامانة غرس اسن الاثنين 06 جوان 2011 اتونضال المقبرة نباباسعد سوحضار نللوف انمدان دمدتشلاس دتواتس اشهدان غفس سالخير رب اترحم استفت الرحمتس اندم دم.
