اسقس 1792م يوزن الوالي نقسنطينة صالح باي اقت تكيردة غال الوالي ندزير حسن باشا اسوتور اسس استف نتم نغزر انلمزاب دقد الامارتس دالامارة نالاتراك انحد وضضن .توات انوغلان جرون امشاوران امفهامان القلت انوقبلنسان اتاف دقد الاتراك اوزنان الشيخ الحاج ابراهيم باحماني ادس اقت تكيردة غال حسن باشا دزير اتقنع باش ادر فالقرار نصالح باي دوقمي نغزر انلمزاب ازغار نالحكم نالاتراك .
صالح باي بعد القرار يحقد فات اغرسان نقسطينة يفرض فالتجار اقت البزرة ايتزعلك وحدنسان بلا حد وضضن مان يج توات اتشران مع القلت نولقبلانسان ازول نالبزرة .يج صالح باي ادحبو سوغيل فقاع ايتلنسان دتحوننسان اتوزعكان غال وزغار نقسنطينة رولان توات كرمان الزاوية انبوحجر مان الشيخ نالزاوية اغار اعافر باش ادقنع صالح باي اددول الرايس ير ايتلي نات اغرسان دون ايب سالقوة.
قاع انضران اات اغرسان بدان درجاز اقن يد صالح باي ضد احبو نالعسكر نفرنسا اوضان غال ادسان نوغرم نقسنطينة اوحبو غفس.
توات جرون ازوزنان يغلب نمجاهدان ادوسين سوغلان ادمناوت تمو بدان يد العسكر نالاتراك اورى فوغرم نقسنطينة مان القائد نالعسكر نفرنسا بعد اوض نقسنطينة فوس نتومان استعرف سالقوة دالارادة نات اغرسان امنغان شرطان بعد ابدي انورزام نتفاوت القلت انوتاف نالعسكر نفرنسا غال تزكروين اخدمان عمران دسنت ات اغرسان اماس نقسنطينة يج يغلب نتواشولين اجزائريان ادزنان تمطاتنسان دترونسان غال الحومات نات اغرسان باش اولتوصنت سوفوس نالعسكر نات ومان ادجين المنكر المدة نشارد نوسان اماس نوغرم . بعد تواغيت امركنتيان نقسنطينة استعرفان ستوات ازلاناسان اقت تمورت ادسان نقسنطينة تلا غال اماروا بعد اتوسبل دالحبوس اونضال نمنت.
