اغزر نوغلان انقاع اغرمان نتمورا تمسلمين يلا اتدر اقن وسان دزعلاك يور نالخير درزان مان مدان رنين سودج نالخير بالخصوص اعاون دبدي يد اضعاف مع ارني ننفاشات دالصدقات امرشدان دوسفطار نضعاف دوس لاشغرس اخص تمدورتس .
غال اماروا زذغ مدان الان اطفان دمناوت لعوايد انورقاب نيور دقت العادة الان اطفان دس مدان نوغلان دين اثضاع غال اموشان اولين انوورير نبوهراوة تغردايت دمناو اموشان اضضنين اورقاب نيور مان اتقمان دن ال دفر تسمسين دس مناو اعزبان دمصوردى دروان ادمدان اورقاب دعسي فتلاليت نيور انرمضان بعد اتزاليت نتسامسين ادولان غال تمجديدا مان ادسجوران اوال فوتاف نرمضان انغ القلتس بعد اشاور نمقرانان نعزابان.
اماشي اناف القران اتقم اتوعزام سوس امزوار نيور نوزومي تمجدوين سسانت تمجيدا تكبورت نتغردايت بلا ابدي ال اقدى نرمضان مان اعزبان ددموان نتمجدا سهرن فالعادة دوزوني نالمعروف اش بعد تزاليت انجار تسمسين دتنضاس مع اواعظ دتزاليت نالتراويح دوترى نيوش امقران باش ادحفظ اغلان ددزير اماشي اناف اقت العادة تضضت ايتبهى دين ازوني نالقران اش اض نالجمعة فمدان باش اش حد ادعزم تونتس تدارت المدة نسبي دقت الوسيلة باش القران اولخطي تدار اتوعزام ضدجيض ددقس اش امار دقت الطريقة دخ باش امزانان ادلمدان ادرقبان الوالدننسان اتحفظان فوعزام نالقران بالخصوص لكنغ اقت الوقت الان نشرنت دس الوسائل نوسلهي انتلفزيون سالقنواتس مع الانترنت دالتاولات تضضنتين الانت هلكنت الحالت سباعدانت مدان سوبريد نيوش امقران دوعمر نتمجيدا دموشان اضضنين نالعرش.
سبسون اوحديان دخ يور نوزومي اغلان دين اجرو نتواشولين دمدتشال ضدجيض فالكاس نلتاي الان اجرو مدان اش حد دالنيتس دقن ايور الان اتقان جار اولاون مدان دقلان غال بعضهم سومسماح دفكر نالاخرة دون اوصى غفس اسر نيوش امقران محمد تزاليت دسلام غفس.
