اسقس 1955 ابدان مناو امقرانان انتقراولة اسسن بن خدة دعبان رمضان اتفكران اوسدج نقت النشيد اغناو اوسحرش انمدان بالخصوص امكراس اوبدي يد امجاهدان دتقراولة كلفان لخضر رباح باش ادملاقة يد مفدي زكرياء اتوسان سالنشيد فداء الجزائر روحي ومالي اتيوري اسقس 1937.
رباح يملاقة يد مفدي زكرياء اماس ندزير تعجبت الفكرة انتيرى نقن النشيد ادقيم دزمول ندزير دتقراولة ادرني ادشجع امجاهدان الان اوريران اورى ندزير سوفوس ناتومان.
مفدي زكرياء اوجد قسما المدة انسن وسان يلا وس يقار يوريت سدمناس اموران نالحبس انبربروس يلا وس يقار بل قسما يوريت اماس انتحنوتس تزكرة نالقصبة اسقس 1955 .
بعد تيرى انقسما يبدى مفدي يد دمناو امقرانان انتقراولة اتغاران يد انازوران انغ الفنانين اوف نقن حد باش ادلحان النشيد.
ابدان ادملاقا دجروان تدارتس القبة يد مناو انازوران باش ادحفظان قسما دوسجلاس انلاس انغ الاذاعة ندزير دوزونيس غال ايولوا اموشان دزيرادوزغار بعد اتوقبال سوفوس نودموان انتقراولة.
امزوار ايلحنان قسما دين محمد التوري تدارت انمفدي القبة اللحن فيدسن اتودج تونس سوفوس انمحد اتريكي تدارت نالبعثة تونس اما اللحن فيدشارد اتولحن مصر سوفوس انمحمد فوزي.
النشيد قسما اساوال يغلب سوضحى نجزائريان دوعاون نمجاهدان اماشي اواعاد الاستعمار سلس انمدان اند بل فرنسا اتخلص زذغ اتندم اس اتوتف دس غال دزير.
مفدي دقن ستروى نغزر انلمزاب ادلول اغرم نات ازجن الان اسوفغد يد اغرمان اضضنين انوغلان للوف ننعزمان دسلمادان دمقرانان سبلان تمدورتنسان دويتلنسان ايمال نتمورت ندزير.
