ترى نتوتلايت نتمازيغت سلحروف انتفناغ دقت تيرى تكبورت دنج تمورت غرس دلان. تيرى انتفناغ اتناف دمناو اموشان تمورتنغ اتواري دنج اضغاغان اجانا نوريران دالغيران ددسان تغزران اموشان اتوغان عمران مدان امازغان . تيرايو انتاف دخ ازرابة اتونقاش الفضة فلحساب نالتاولات اغرسان الوقتن.
اماشي اوفين دخ اماسانن ددباب نالاثار مناو اموشان اضضنين دمناو تمورا نوجانا نفريقيا انتمورت انليبيا دالماروك دمالي دالنيجر،يلا وس يرو تيرى انتفناغ غال سمس للوف نسقسان قبل تلاليت نسيدنا عيسى يلا وس يقار بل تفناغ تفغد امار نالفنيقيين العهد نوجليد ماسنيسا
ستماس تنعزامت مليكة حشيد تبراس يغلب فتيرى انتفناغ دزير توض توف بل التفيناغ اتدقل غال 1500 نسقسان قبل تلاليت نسيدنا عيسى دقت ستيرى دتوتريين تكبار دنج اتمورت. اماسان زذغ اولوضان غال الاصل امزوار انترى انتفناغ اش حد غرس لمارتس دلاصل نتيرايو.
تمشروست ادفغان اسقسن امدجورا بعد ارسم نتوتلايت نتمازيغت توتلايت نتمورت ندزير يلا وس يغس تيراس سلحروف ستقامنت يلا وس يغس تيراس ستعرابت.
مولود معمري دقن سنعزمان امقرانان ابرسان توتلايت نتمازيغت اسرس لجواية 35 نلحروف ستقامنت توسخدام يغلب دزير دموشان اضضنين.
اماشي اعافران مناو توات اغلان باش ادسدران عاودان اريند توتلايت نتوغرسنت غال تمدورت انمدان سسان عبد الرحمن حواش ابراهيم عبد السلام نوح عبد الله صالح ترشين عبد الوهاب فخار ادمناواضضنين.