لفراح دلعراس اغلان غرسان اقت الميزة اولتلي انشان وضضن دزير لعوايد نلعراس افغنتد سوماس نالدين الان دجورن جار مدان، لعوايد اتوسننت سوحافظ دوقرى نتمدورت جار مدان بالخصوص جار اققلان دمركنتيان.
سومن لعراس اغلان دجورن فلحساب نالقوانين اتسرس تمجيدا باش مدان ادجورن دسن باش اولضري اصورف نالحرمة دبسون الان تفغن ابريد.
سالقوانين دين اسهل نلمور اوسلي دات غرسان باش اولتحوسين سالمصاريف نالعرس اديمنكزان غفس الدرك اموني سوبدي نتروى نتعشرت يد باب نالعرس سوبدى ال اقدى دوعاونس سون الومان بالخصوص با حد دقليل سضعف لاش غرس.
سالقوانين دالاعراف دين لاش اقون اتسلت اسامورا نغيرانغ لازم اسامورا نوغلان دلعوايد لاش انوض اغولاد ستمجورين اقاي نتسلت غال ورجازس امناع نوقضاع نتمكراس غال باب نالعرس بالخصوص ضدجيض امار الان مدان اطسان انغ وس اولزمير جد ادتشر غال وخدام بكري اتاتف اقرى نالحرمة نمدان.
اعراض نمدان اتودج اضن العرس اتوعزام دس القران دواعاظ دوششي نمدان دالمعروف مع توترى نعزابان باش يوش امقران ادسنمر جار تواشولين.لاس الموسيقة انغ اشرى الان اتخالف الشرع دلعوايد نوغلان.
النظام نالعرس اناف تسدنان وحدنسنت ارجازن وحدنسان لاش الخلطة مان تسدان دخ فرحنت ستسلت الحدود نالقوانين اتسرس تمجيدا مع القلت نوقون نوورغ دبسون الان اسقالان تطاوين لاشغرسان العلاقة مع الدين .مان مدان ادلين قاع فمار اقليل اولتحوسي سالحقرة انغ اقن امونكز مدان قاع حضران تبدان ادس انت انومركانتي.
اناف الهيئة نتمسريدين بدنت قرانت اطبق القانون اماس نلعراس نتسادنان توغ اقت العادة بكري زذغ تلا تجور غال اماروا مناو اغرمان دين اكلي نوس اصورف القوانين التبرية الة ال دتوب دسات اعزبان اسورن سماع دالقلت نودوال غال وبريد دوقرى نالقوانين نتمجديدا .
توني دقت الوسيلة تود تضفوين توحديين المجتمع دقت الطريقة الان تطف مدان ادجورن ابريد ددتشل جار مدان يج المذهب الاباضي دون الان دي زذغ يلا يدجور غال اماروا امغر دون دبريد ننتدت.
تغردايت: الشيخ باعلي واعمر