اغلان اتوسان سبكري دنشان انوعزام دنعزمان فنجال نالوجد نغربازان نالقران الغابة دوغرم مان امزنان لاش غرسان الوقت انونوض اغولاد الان اتويد غير لهلاك، بكري اتوغان حرصان غير اسعزام انبورخس هملان اسعزم نتمطوط اتقم جاهلة تدارت تجد تضفوين توشتمين اماس نالمجتمع .
الجهل اصوض مناو اسقسان بالخصوص تسدنان اتامنانت يغلب سمناو ابسون دالخرافات انوقضاع غال انيلان نالاولياء غرسن دس اسوتورنت تروى انغ املاش ادمناو ابسون،اهيل نوسعزم انتزوت يبدى مع الحملة نالاصلاح ايبدى دس الشيخ بيوض احارب نالجهل ازاقا اوسعزم نتبورخست دسلي نالشانس انورجاز.
اعافران اجند تضفوين توحديين اغلان اسلي نالمستوى انوعزام مع ورزام نغربازن اتبورخساتين دالمراكز انولماد ادوحفاظ نالقران دالدين دالشرع،اسقسن امدجورا بعد افوغ انتدشلا امحو الامية دزير توض غال وغلان مان اتورزمان مناو اغربازن اتماطات تزعلاك درجازن الان اولعزيمان يلا وس يعرض القران مع وفهامس يلا وس اوض غال المستوى نالباكالوريا.
انعزام ...مصطفى رمضان
مصطفى رمضان مميس نالحاج ابراهيم رمضان اقن سودموان اخدمان تقراولة تم انوغلان اسبل تمدورتس ايدزير اتللي نجزائريان.
الحاج ابراهيم يجد مناو بورخس اسيسان مصطفى اتيوي يوش امقران غرس ادلمانة يور نوزومي 2018 اتوسان جار توات سدباب نالخير ايلولد اسقس 1947 اغلان مان يبدى اعزامس امبعد يقضع اسوغلان غال قسنطينة ايرني دس اعزام ادولماد.
تمدورتس اطف مناو اموشان الشركة انسوناطراك يتوغ دقن سالاعضاء نوسقم نالولاية نالاغواط ينده احرش نالاتصال يتوغ دالمراسل نونلاس «ب.ب.س» لندن دالمراسل نالجورنال نالمجاهد دقن سالمحررين الجريدة نالشعب يوري يغلب نالمقالات دمناو ادالجورنال اتوغ غرس اقت تنوبا انلاس نتغردايت.
اماشي اسعزم دمناو اغربازان تغردايت جار المعهد نالاصلاح دالمعهد نامي سعيد دوغرباز نالتقني نالبايليك انوغرباز انحمود رمضان،اسقسنو امدجورا اسلفاد اقت تضليست اسمايس نزهة الالباب دنشان انوعزام دوسلماد ددوملاقة نمكراس دنلمادان .
اماشي يتوغ انده دخ يد تدشلا نالعلماء نمسلمان الفرع نتغردايت مع انعارس يد مناوت تدشلوين اخدمنت الخير دوعاون بالخصوص احرش انوعزام دوسلماد.
مصطفى رمضان دقن سالاخيار انتوات ايقضع امار ايتوغ مدان اسحقنت يجد انشانس اويت يوش امقران غرس يور انرمضان نت ازوم اموني اسن 25 ماي 2018 رب اترحم اوسع غفس.